الأربعاء، مايو 21، 2008

بائعة المترو

كانت مستندة الى احدى العمدان داخل عربة السيدات فى مترو الانفااق ... ترتدى جلباب منقوش (فى بعض الاحيان يطلقون عليه عباءة) ... تلف رأسها بغطاء رأس اسود ... تبدو عليها علامات الثقة بالنفس والبشر ... تتحدث الى احدى السيدات بجوارها ، وكل منهما يحمل حقيبة كبيرة سوداء اللون ..ممتلئة عن أخرها ...كل منهما تسأل الاخرى عن احوالها ، والاجابات ما بين " حماتى فى المستشفى... جوزى بألو يومين من غير شغل ... مسكونى بالبضاعة فى غمرة ..." .
واذ بنسخة ثالثة منهما تدخل المترو عند المحطة ... ترتب فى حقائبها السوداء الكبيرة الممتلئة...وما ان تغلق الابواب تلقائيا حتى تنادى صائحة " حد عايز شربات..اكسسوارات ..معصم ........ " لتلمحهما فى أخر العربة مستندتان الى ذلك العمود ... فيتبادلن الابتسمات ..ثم السلامات ..وقبلات الحفاوة والترحاب..واسئلة من نوعية ..انتى فين ..مبنشفكيش ليه......وتأتى الاجابات بنفس الكيفية .
اما البائعة ذات العباءة المنقوشة وغطاء الرأس الاسود والتى لا يزيد عمرها بأى حال عن 25 عام ، قطعت كلامها معهن فجأة لتستجيب لطلب أحدى السيدات من راكبات القطار والتى كانت تسأل عن قلم ....لتخرج البائعة قلم من حقيبتها الشخصية ...ثم كتيب صغير قائلة " اتفضلى لو عايزة ورقة اقطعى من الاندكس indexبتاعى " .
واستمرت صاحبتنا هذه فى الحديث الشيق مع البائعتين زميلات المهنة ...وكل منهن تشكى من الاحوال والهموم ...ولكن بلهجة تتناقض مع هذه الهموم ...كل منهن تحكى همومها والابتسامة لا تفارق وجهها ...كانت لهجة حوارهن مليئة بالبشر...ربما السخرية...سخرية من الواقع الذى جعل من صاحبة العباة ذات ال25 عام والتى ترتدى دبلة من الفضة فى يدها الشمال تختبىء لاسفل عند كل محطة من محطات القطار حنى لا يراها المفتشين .
وتستطرد فى الحديث مع البائعات "انتو مش هتبيعوا بأه ...انا عن نفسى مكسلة شوية " ....
فتقطع احدى الراكبات حديثهن " عندك دبابيس تحجيبة " ...فتنشغل صاحبتنا فى هذه البيعية التى لن تزيد عن 50 قرش ....
واذ بسيدة كبيرة فى السن تنظر اليها نظرة حانية قائلة " طيب وانتى يا بنتى بتعملى ايه مع المفتشين لما يشوفوا البضاعة " ...
فتجيب صاحبتنا بنفس الضحكة الساخرة " مرة واحد مفتش قابلنى فى الدمرداش ..قالى معاكى ايه..قلتلة اصدك فى التعليم ولا البضاعة..قلى الاتنين ...قلتله البضاعة ..معايا اكسسوارات ومكياجات...ام التعليم فمعايا ليسانس اداب فرنساوى ... قالى اتكلى على الله "
ثم انتلقت صائحة " حد عايز بديهات ..شرابات..اكسسوارات...قلم كحل...رو.....................................................................................................................................................

هناك 49 تعليقًا:

Tamer Nabil يقول...

كتير فى نفس طريق اللى اتكلمتى عليهم


هو عمر الشغل ما كان عيب

هو اللى يزعل عدم عملها فى مكانها المناسب ودة عشان الحال اللى كلنا عارفينة.


تحياتى

ADAM يقول...

سبحان الله

ربنا يسلمنا

دا أنا في 3 دار علوم

يعني هبيع إيه ؟

ورق أذكار ؟


بس الله يكون في عةنهم فعلا بيعانوا

عشان لقمة العيش

أنا أعرف ولاد شغالين شغلانات ناس معهاش ابتدائية

وهم خريجين هندسة وآداب وغيرها


تحياتي لسردك القصصي الرائع


آدم

Samar El Menoufi يقول...

I like it ya samoura..
but i think kant 3aiza shoyet details kaman

Salah Slim يقول...

سمر تميلي للواقعية في الحكي وده جميل انك بتبصي على التفاصيل الدقيقة

Salah Slim يقول...

سمر
بعد التحية
اسلوبك جميل في السرد بس لازم تكملي الموضوع ما تسيبي القصة وقفه عند حد معين وهي تميل للواقعية
تقبلي مروري
salahslim

ٍSOU يقول...

اسلوبك رائع فى الكتابة ..يجد حاجة تقهر ان الواحد تطلع عينة ف المذاكرة و ف الاخر يشتغل شغل بعيد تماما عن مجالة بس هى الظروف كدة و اكيد دة احسن ليهم..ماحدش عارف الغيب

رصيف نمرة خمسة يقول...

بقى الطبيعى انك تشتغلى فى حاجة عمرك ما درستيها ولا تعرفى عنها حاجة
وبقى عادى برده تركبى تاكسى يبقى هندسه ولا صيدلة حتى مرة ركبت السواق بيقول انه خريج هندسة طيران ومشتغلش

دى حاجة تجيب الضغط وبطمنا اوى على مستقبلنا الباهر القادم
ربنا معاكى


سلام ياسمورة

في حب مصر يقول...

هو البيع بالطريقة دي وصل كمان لمترو الانفاق؟؟

ليسانس اداب فرنساوي بتيبيع في المترو.. عمار يا مصر؟؟

تقبلي مروري

almasry يقول...

بتعب قوى لحد ما ألاقى طريق الكومينتز بتاعك


تحيــــــــــاتى
المصـــــــــــــرى

عايش ولكن يقول...

الشغل مش عيب
وخصوصا فى بلدنا دى
اللى الفقر فيها بيزيد ورا يوم
والاحتكار فيها بيزيد كل يوم
اللهم عافنا يارب
واسترنا فوق الارض
وتحت الارض
ويوم العرض عليك
تحياتى
علاء

أنا حر يقول...

في بلدنا الجميلة الشهادات لا محل لها من الاعراب
ربنا معاها ومع كل المصريين
تحياتي

مصطفى عثمان يقول...

سمر
انا لاحظت ان كل الناس قبلي قالوا الشغل مش عيب
اوكي ماشي
لكن برده الكسل عيب جدا
دلوقتي اللي مش بيلاقي شغله في مجاله تجيله على الجاهز
ولا بيدور ولا يحزنون
يقوم بعدها رايح شغال سواق او زي بطله قصتنا
مع انه لو فكر في حاجه جديده
و فتح مشورع صغير مثلا
احتمال ينجح
لكن الكل دلوقتي بيستسهل
اما عن القصه كانت عاوزة منك شويه تفاصيل
كنت عايز اشوف الابطال بشكل اكبر من كده
بس حلوة القصه
شكراااااااا سمر

بنات صاحبة الجلالة يقول...

طبعا الشغل مش عيب واكيد ظروف قوية اجبرتها انها تبيع بالطريقة دي في المترو وتستحمل الهروب من المفتشين انا بشوف كمان ناس كبيرة في السن تطلع تبيع نعناع ومناديل اي سلعه تجبلها فلوس وخلاص دا غير الاطفال اللي بتطلع توزع الاذكار في ناس كتيرة اوي ظروفها صعبه تدفعهم للعمل في اي حاجة

موضوعك جميل ومؤثر اوي ياسمر تسلم ايديكي

تقبلي مرورنا وتحياتنا

Miso soup يقول...

انا مش شايف ان فيه مشكلة انها تكون ليسانس فرنساوي او حتي بكالريوس طب و تيبع لان مش كل واحد اخد شهادة يبقي بيفهم في المجالبتاع شهادته (في ظل نظامنا التعليمي المتميز) مهو ممكن مبتحبش المجال ده خالص و ممكن تكون اخدت الشهاده بطلوع الروح ملاحق و دبلرة و في الاخر بمقبول .. تفتكروا ده ينفع؟؟!!
ان شايف ان المشكلة هي غياب المشروع ... ممكن تكون بتبيع في المترو و خلاص .. اليوم بيومه ....و ممكن انها يكون عندها حلم او مشروع انها في يوم تكون صاحبت محل كبير او مصنع كبير ... نفس الكلام علي اي واحد مهما كان مؤهله

مدونة يا أبت ... إني رأيت يقول...

أنا بحييك علي اللفتة الطيبة ده , بيعجبني دايما الشخصيات اللي بتقرء الأحداث , والأجمل ان ننفعل ونتأثر بأحوال غيرنا , ربما لنصبر علي ما نحن فيه او نشكر الله علي نعمة قد اعطاها لنا وحرم منها غيرنا , وهذا ايضا يعكس مدي التدهور الإقتصادي الذي تعيش فيه مصر هذه الأيام .
بشكرك تاني ياسمر علي الفتة ده

واحد من البلد دى يقول...

الحل الوحيد..
إنها تشتغل فى الحزب (الوثنى)..
لأن غير كده يبقى أمرها لله بقى تشتغل فى حديد عز مؤقتا..
يمكن تطلع فى الإعلان وتقول بمنتهى الفخر و المعر و النعر و العنجهية المستمدة من الوصولية المتفشية فى الشركات الوثنية من خلال بعض الملوخية التى ينقصها قليلا من التقلية مما يؤدى إلى الأحقاد الطبقية التى ربما من تحت الطبلية ...
مش قادر أكمل و الله العظيم ..أصل المسميات ياما آوى ومش حتخلص لو قعدت أكتب للصبح..
بس بجد و الله العظيم الحل الوحيد إنها تشوف حاجة من إتنين..
واحد إبن حلال يتجوزها على ما هى عليه(من الثقافة و الفقر)أو واحد برضه بس يجيب لها سفر خارج البلد..
ولها و لنا الله..
ملحوظة..انا نزلت بوست جديد

Abo 7anf يقول...

السلام عليكم
ازيك يسملا فينك من زمان
مهى دى بلدنا للاسف التعليم بقى مجرد كماله
وشهاده تتعلق على الحيط
مش كسل ولا عياقه
لكن لقله فرص العمل
ويمكن الانتى قبلتيها محظوظه انها اشتغلت
وان كانت كل يوم بتلعب توم وجيرى مع المفتشين
يلا حمدالله على السلامه

Abo 7anf يقول...

السلام عليكم
فينك يسمر من زمان حمداللهعلى السلامه
للاسف دا بقى حال بلدنا
زمان كانت الشهادات ببتعلق على الحيطه عياقه
دلوقتى بقت من الغلب
مفيش وظايف
فالناس بتحاول تدور على وظيفه عمل
زى الانتى شفتيها
ومقضيها توم وجيرى مع المفتش

HelSiNg يقول...

السلام عليكم

سردك للموقف جميل

اتضايقت جدا فى الأخر

بجد حاجة تزعل لما انسان يقعد يتعلم اكتر من 15 سنة عشان يفيد الناس بعلمه ويفيد بلده وفى الاخر يشتغل ..بائعة مترو

مؤنس فرحان يقول...

أسلوبك جميل جدا يا سمر

عيشتينا معاهم اللحظات دى فى المترو .. حسينا كاننا كنا واقفين معاهم بالظبط
..........

للأسف دى مأساة بلد زى بلدنا .. افرحو يا ناس الثورة خليتلنا التعليم مجانى .. وتعليم فيه اللى فيه
وبعد كده مفيش شغل
واعتمد على نفسك واشتغل اى حاجة .. ونرجع نقول النصابين والشحاتين كترو ليه
..........

انا ليا فترة موش بدخل نيت كتير بسبب ظروف الشغل لكن اليومين دوول دخلت لفيت عالمدونات من تانى وحسيت انى رجعت البيت
بجد ابداعات الناس واحاسيسها ايا كان اسلوبها بيخلى الواحد يطمن شوية اننا واعيين ومدركين لظروف بلدنا وحالتنا وبنحاول ندور على حلول وموش ساكتين ولو دلوقتى فى مشكلة فاإللى جاى اكيد فيه تغيير

بالتوفيق يا سمر فى كل كتاباتك

Whispers just for a Night يقول...

ساعات قليلة لنتحد ولو لدقيقة
الساعة الرابعة عصراً نرسل رسالتنا الأخيرة
http://kawlansadida.blogspot.com/2008/05/blog-post_24.html

26.05.2008

هيثم الدهشان يقول...

كتير يا سمر زيها مش لاقين الرغيف بيشتغلوا اى حاجة بس يعيشوا
المؤهل بقى مجرد شهادة تتبروز

تقبلى تحياتى

FaceMoon يقول...

اهى بتشغل نفسها احسن من الناس اللى قاعدين على طول الخط بس برضة والله حرام ياناس واحدة تتعب فى التعليم 22 سنة وتتدخل كمان كلية كويسة وتبقى كدة فى الاخر صبرهم يارب
تحياتى

خواطر رئيس شاب يقول...

الشعب المصرى كله بالوضع ده
من الغفير للوزير

الغفير بيبقى معاه بكالوريوس
ووزير التعليم كان دكتور بشرى

كله بالوساطة والمحسوبية

تحياتى

نسر الشرق يقول...

السلام عليكم

دى اول زيارة لية

هذة المدونة جميلة ودماها شربات

سلااااام

.:.-=- ELGaZaLy-=-.:. يقول...

اسلوبك مميز اوى يا سمر بجد

شيق اوى وقوى ,,,وبيناسب بشكل ممتاز عجبنى اوى اخر جزء دة

-----------------------
مرة واحد مفتش قابلنى فى الدمرداش ..قالى معاكى ايه..قلتلة اصدك فى التعليم ولا البضاعة..قلى الاتنين ...قلتله البضاعة ..معايا اكسسوارات ومكياجات...ام التعليم فمعايا ليسانس اداب فرنساوى ... قالى اتكلى على الله " ثم انتلقت صائحة " حد عايز بديهات ..شرابات..اكسسوارات...قلم كحل...رو....
------------------------

بجد قوية اوى القصة واسلوبك فى السرد رائع تحياتى

زى الهوا يقول...

مش عارفة بس ماعتقدش انها فعلا خريجة اداب فرنساوى , طب واما هيه كدة مادورتش ليه على حاجة احسن , اه مش هتشتغل فى مجالها ودا وارد , بس على الاقل تشتغل حاجة ممكن ترتقى بيها وتكبرها , دى ممكن تروح تقدم فى مدرسة تشتغل مدرسة فرنش او نجلش اوحتى عربى , اول لما اتخرجت كنت عندى احساس ان الدنيا وحشة ومافيش شغل , زى مابسمع ديما من الشباب , بس لما خرجت وشوفت الوظايف , والله الوظايف مكسرة الدنيا , فى اكتر من الكورسات دلوقتى اللى بقوا يخدوا كورس انجلش مثلا ويخدوا مرتب شهرى جنب الكورس , وبعدها الوظيفة مضمونة برده , والله احنا اللى مأفورنها

إخوانى حتى النخاع يقول...

السلام عليكم


دا حال الشباب كمان وحال الرجالة

مرة أمى كانت بتشترى خضرة من شاب فى السوق

قالتله انتا غى معهد إيه ؟؟

قالها انا فى كلية آداب

هتعملى إيه ؟؟

الناس عاوزة تجيب لقمة عيش

شكراا ليك للبوست الجميل دا

واصطنعتك لنفسي يقول...

لا حول ولا قوة إلا بالله

افتكرت حاجة واحدة

ولتسألن يومئذ عن النعيم

ده كابوس الناس بتعيشه كل يوم للأسف الشديد..كابوس محتاجين نفوق منه بقي

يارب اصلح حالنا وأحوال المسلمين أجمعين

سلمت أناملك
وصفك مبدع

إيمان

Nazk El Maleka يقول...

عودة من جديد..
:(
لا حول ولا قوة الا بالله ..
دى اخرتها في البلد دى...
حسبي الله ونعم الوكيل..
اوجزتى في توصيل الحكاية يا سمر
جزاك الله خير..

ليك تاج عندى اتفضلي استلميه من المدونة
...
تحياتى
:)

ياأبت...إني رأيت يقول...

للتواصل

( امرأة من زمن العزيز )

مدونة يا أبت إني رأيت

Tamer Nabil يقول...

انا كنت قلقان عليكى عشان مش موجودة ومش بتردى

بس شوفت كم تعقيب جديد فى مدونات كتير
طيب طمنى الناس اللى بتسال
كدة انا اطمنت انك بخير ومش هجى اسال تانى عليكى

وعلى فكرة انا بسال على كل الناس اللى اعرفها وبهتم بيها

تحياتى

أسامة أبوالخير يقول...

تحياتي سمر على فكره اسلوبك ممتع ومميز على الرغم إني مبحبش الكتابة العامية لكن حبيتها أسمك جميل زي اسلوبك على فكره أنا بعمل صحفي ياريت تزوريني أن وكل محبينك

كوارث يقول...

القصة اكتر من هايلة وفكرتها جديدة جدا وده حاجه بحسدك عليها
اسلوبك جميل والفصحى عندكم في التماموفيتش يعني اللهم ثلي على كامل النور
نيجي لرايي الشخصي بقه - قال يعني اللي فوق راي الجيران -
انا نظرتي للموضوع ده بتختلف على فكرة
تفتكري البنت اللى بتعمل كده عشان تعرف تأكل نفسها - اكيد ده الهدف معتقدش انها هتهين نفسها كده عشان تجيب شيتوس - البنت اللي بتعمل كده تستحق من مجتمعنا ايه ؟
انا شايف انها تستحق تكون على قمة المجتمع مش في قاعه كما يري عامة الناس اللي بيبصوا للناس ده بازدارء والخ الخ
مين افضل .. بنت واقفة في جامعة الدول مستنية العربية اللي تيجي ولا بنت شايلة شنطة بهدوم واكسسوارات وبتلف بيها عالدنيا وتلاقي الشنطة قدها مرتين ؟
وتلاقي الاقبال الشعبي عالتانيه لا يقارن بالاولى اصلا .. سبحان الله .. يا أمة ضحكت !

روينا يقول...

ازيك يا سموره عامله ايه
اولا اسلوبك مسلى فى الكتابه ربنا يبارك لك
تانيا مفروض نتعلم من تجارب الناس ونعرف ان التعليم والكليه مش هينفعو ببصله
مبينبناش غير قلق الامتحنات وخلاص
والاخر كلنا هنقعد على الرصيف نبيع ترمس
بس الظاهر كمان ان الرصيف اتملى
ربنا يستررررررررررر

أحمد سعيد بسيوني يقول...

تخيلي بقى القصة دي
بيحكي احد اصدقائنا انه كان راكب تاكسي وكان تعبان شوية فبيتكلم مع السواق فعرف منه انه تعبان فقال له الاسطى خد الدواء الفلاني والفلاني
فيقول صاحبنا قلت له انت هتفتي انت كمان
فرد عليه الاسطى رد ماساوي وهو انه خريج كلية طب ولكن لم يجد فرصته في الممارسة بسبب نقص امكانياته المادية
يبقى انت اكيد في مصر
لنا الله

حطم القيود يقول...

:)

كلُ يغنى على ليلاه!!!
======
انا خلصت النهارده....عقبااااالك

خالص تحياتى

Eldebug يقول...

تصدقى انا من كتر مااتعلقت بالناس دى فى مرة وانا راكب قطر اسكندرية كالعادة كان فى واحد متعود يركب من دمنهور فى يوم ماركبش ... مرضتش انزل من القطر غير لما ادور على واحد من اصحابه اساله عليه

اسلوبك لذيذ اوى

تحيااااتى

*سمر* يقول...

Tamer nabil *
بالظبط كده ..ده اللى انا قصدته ..
شكرا على الزيارة والتعليق ...
وبعتذر مرة تانية للتاخير فى الرد..وزى ما قولتك بالظبط ده اللى حصل ..وادعيلى بأه فى الامتحانات :)

Adam *
لء ان شاء الله تشتغل الشغله اللى انت عايزها واكتر ..ربنا يكرمك..بس انت اجتهد واعمل اللى عليك...وربنا يرزقنا ويرزقك الشغل...
شكرا على اطرائك ..اتمنى تكررا الزيارة

Samar el monoufi *
تعليقاتك دايما بتسعدنى وبتفدنى يا سمورة والله...
انا عايزاكى تنصحينى كده على طول :)
متتأخريش

Salah slim *
هى القصة كده ملهاش تكملة تانية ..تكملتها ان انا نزلت بعد كده من المترو وسبتها :)
متشكرة على مرورك..والتعليق ..اتمنى يتكرروا...

Sou *
بالظبط كده ..محدش عارف فين الخير ..بس برده اكيد وهى فى الكلية مكنتش بتحلم تكون بائعة مترو ..مع احترامى الشديدي ليهم والله ولكفاحهم المشرف...
شكرا على التعليق والاطراء الجميل ده ...متتاخريش :)

رصيف نمرة خمسة *
عاملة ايه فى الامتحانات ..وبألك كتير مختفية يعنى ..عايزن نشوفك :)
ربنا معاكى انتى كمان ...معانا كلنا

فى حب مصر *
ااااه البيع وصل للدرجة دى واكتر والله ...انا اعرف واحد عتال خريج كلية العلوم :( للأسف عمار يا مصر
بسعد دايما بزيارتك بجد :)

Almasry *
شكرا على تعبك بالزيارة والتعليق :))

عايش ولكن *
اللهم امين ..اللهم امين ..
شكرا يا علاء على زيارتك وتعليقك الجميل..اتمنى تكررهم

أنا حر *
للاسف كلامك صح
تقبل تحياتى

مصطفى عثمان *
شكرا يا مصطفى على اطرائك..ونصيحتك طبعا ..
ان شاء الله اسلوبى يتحسن مع الوقت ... :) وبشكرك تانى
اما حكاية المشروع او كده ..فهو فعلا لكل مجتهد نصيب ...لمن ساعات ظروف الانسان بتكون اقوى منه
شد حييلك فى المذاكرة :)

بنات صاحبة الجلالة *
اشكرك على الاطراء ...والزيارة والتعليق ..اتمنى يتكررو..
اكيد مش عيب انها تشتغل ..بس دى شغلة لا تتناسب مع تعليم لمدة 15 سنة ..وتعليم عالى كمان

Miso soup *
كلامك فى التماموفيتش :)
بس برده انا لسه شايفة ان ليسانس اداب تبيع فى المترو دى مشكلة ..مش شرط فيها ..بس فى التعليم ممكن ..فى الظروف ...لكن مازالت المشكلة قائمة...
اما حكاية غياب المشروع فهى صح جدا جدا ..لأن مافيش حد بيكون عايز حاجة ويخطط ليها الا لمل يوصلها ..
شكرا وليد :)

*سمر* يقول...

يا ابت انى رأيت *
متشكرة جدا ..الف شكر ...
تقبل تحياتى

واحد من البلد دى *
" يمكن تطلع فى الإعلان وتقول بمنتهى الفخر و المعر و النعر و العنجهية المستمدة من الوصولية المتفشية فى الشركات الوثنية من خلال بعض الملوخية التى ينقصها قليلا من التقلية مما يؤدى إلى الأحقاد الطبقية التى ربما من تحت الطبلية ... "
بجد اجمد كومنت...فعلا شاعر فنان :)
بس على فكرة انت مقريتش القصة كويس لانها كانت متجوزة..وفى ايدها الشمال دبلة فضة :))

Abo 7anaf *
شكرا على سؤالك ..الله يسلمك ..بس بمتحن حاليا .ولسة بمتحن برده :)
فعلا الشهادات مبأش لها لزوم حاليا ..للأسف
دمت بخير :)

Helsing *
شكرا على الاطراء ..
اكيد طبعا حاجة تتضايق ..س هو ده الوضع للاسف
شكرا مرة تانية .واشوفك هنا :)

مؤنس فرحان *
الف الف شكر ...رفعت معنوياتى بجد
انت فعلا جبت المفيد ...ده المنحنى الطبيعى لمجانية التعليم ...فعلا افرحوا بأه يا بتوع الثورة
اكيد الناس واعيين ومدركين ...بس هم للأسف مكبوتين...اتمنى يكون فى تعيير ..ده الامل الوحيد ...
اشكرك بشده :) ويا رب تكون بخير

هيثم دهشان *
يظهر كده فعلا ..
اشكرك على الزيارة ...

Facemoon *
مهو اى حد ممكن يشتغل ...بس الفكرة هل شغلته دى مناسبة ولا لء للتعليمو المؤل بتاعة..
اشكرك على الزيارة والتعليق ..ومتتاخريش :)

خواطر رئيس شاب *
الغفير بيبقى معاه بكالوريوس
ووزير التعليم كان دكتور بشرى
انت جبت المفيد
اشكرك على التعليق والزيارة ..ويا ريت تتكرر

نسر الشرق *
سعيده بأول زيارة ..ويا ريت تتكرر ..
واشكرك

.:.-=- ELGaZaLy-=-.:. *
اشكرك بجد بجد ...رفعت معنوياتى بشده ...
اتمنى تكرر الزيارةو التعليق تانى ...

زى الهوا *
الحمد لله انتى ربنا كرمك وقدرتى تلاقى وظيفة ...بس للأسف للأسف فى ناس كتييييييراوى اوى مش لاقيين وظايف ..ومعاهم ما يؤلهم للتوظيف..
بس هو اكيد طبعا لازم كل انسان يسعى ويجتهد ى مكانه ...
اشكرك على الزيارة والتعليق ...اتمنى يتكررو :)

اخوانى حتى النخاع *
للاسف هو ده الحال فعلا ..مش غريبة ..ومبقتش جديدة..
ربنا معانا
شكرا مصطفى :)

واصطنعتك لنفسى*
جميل اوى اوى تعليقك ...دايما تعليقاتك بتكون ذات قيمة ...
شكرا يا ايمان ..ومنورانى دايما :)

Nazek elmalaeka *
للأسف انا بمتحن حاليا ...بس اوعدك اجاوب على التاج فى اقرب فرصة
شكرا جدا على التاج الجميل اللى من صديقة جميلة :)

*سمر* يقول...

اسامة ابو الخير *
متشكرة جدا جدا ...
ان شاء الله اكيد هشوف المدونة ..
اتمنى اشوفك تانى فى مدونتى هنا ...

كوارث *
اولا اسمك غريب ...وتعليقك كارثى :))..اسعدنى بشده...
وكلامك طبعا صح ..بس هى الفكرة انها ملقتش الشغلانة اللى تناسب تعليمها وظروفها ...وده بسبب حاجات كتييير
اشكرك مرة تانية على الزيارة و التعليق ...اتمنى تكررهم

روينا *
ازيك انتى يا جميل ...انا متابعاكى فى المدونة ..[س معنديش وقت بسبب الانتحانات .ز
اتمنى تكونى بخير...شكل الرصيف فعلا اتملى :)
تحياتى

احمد سعيد بسيونى *
اه طبعا الكلام ده باه وضع طبيعى ..
وفعلا لنا الله ..
شكرا على الزيارة

Eldebug *
والله ؟؟؟ ده انت أصيل اوى بجد :)
اشكرك على الزيارة والتعليق ...اتمنى يتكررو ..ز
متشكرة جدا :)

Hosam Yahia حسام يحى يقول...

ايه ياسمر

انتى زعلانه مننا فى حاجه ولا ايه

Hosam Yahia حسام يحى يقول...

ربنا يوفقك يااااااااااارب

ننتظر ابداعاتك اللى عودتينا عليها بعد الامتحانات


:)

mayada يقول...

جميله ياسمر اسلوبك صادق
انا حسيت ان انا معاكي بجد
وبجد ان انا بزعل جدا لما الاقي حاجه زي كده
هي لو كانت تعرف انها بعد ما تتعلم مش
هتلاقي شغل كده اكيد ما كنتش هوبت ناحيه المدارس

عايش ولكن يقول...

ازيك يا سمر
ايه فينك كده
وفين بوستاتك الجديده
يارب يكون المانع خير
تحياتى
علاء

wael يقول...

خاي الحكومه تتبسط
الله يلعن ابو التعليم كله بقا زي بعضه على العموم الحمد لله وحسبي الله ونعم الوكيل في اللي باعو كرامتنا وحتى ماقبضناش التمن

*سمر* يقول...

حسام يحيى *
ادينى قلتلك ..بمتحن..ربنا يوفقك انت كمان ..متشكرة جدا يا حسام بجد :)

mayada *
متشكرة اوى يا ميادة ..اتمنى تكررى الزيارة والتعليق..
اعتقد انها لو تعرف كانت هتتعلم برده..اصل طول ما الانسان عايش ..طول ما عنده امل

عايش ولكن *
متشكرة جدا على سؤالك يا علاء..ان شاء الله خير..انا بس بمتحن :)

wael *
للاسف كلامك صح :(
شكرا على زيارتك عندى والتعليق ..اتمنى تكررهم

أحمــــد يقول...

بسم الله الرحمن الرحيم
كلماتك رائعة
أدعوك لزيارة مدونتى الضرورى تعلقى على المقال
http://ommee.blogspot.com

فتوح أبو المفاتيح يقول...

آآآه يا بلد
التعليم مبقاش ليه لازمة
بس خير
كويس انها لقيت لنفسها شغلانة
وعرفت تشتغل كويس
ربنا يساعد الجميع
سردك وقوة ملاحظتك قوية

سلام عليكم