ايس كريم

فى ظل الاحداث المشحونة ...مشحونة بموجات من الغيظ و الفرسة ...
وفى ظل الاجواء الساخنة ...المولعة بنار جهنم ...
وفى ظل التوتر السائد على كافة الاصعدة ...وصعيد مصر ...
وفى ظل الصداقة المتلاشية ...
وفى ظل البنات المؤرفين ...
والولاد المجرمين ...
والناس الوحشين ..الوحشين ..الوحشين ..
وبما انى فاضلى شهرين واتخرج ..وورايا حاجات تتعمل فى سنتين ...
وبما انى هفقد لقب غالى بعد شهرين .."الطالبة الجامعية "...
وبما ان اختى فى ثانوية عامة ..وبخاف عليها اكتر من خوفها على نفسها ..وجيبالى ضغط ...
وبما ان ابن عمتى هيتجوز واحدة امريكانية ...اتخضيت اوى لما عرفت ...
وحيث ان جدتى مازالت ترسم فى سيناريوهات اكثر رعبا واثارة ...
وحيث انه الجن راكب جارتنا الفاضلة ...
وحيث انه الضوضاءفى القاهرة وصلت الى 85 ديسيل وفقا لدراسة فى النيويورك تايمز ..يعنى ادوش من قطر سكة حديد ...
وحيث ان المضربين اضربوا جميعا ..كان لا بد له هو الأخر من الاضراب ..تعبيرا عن ذاته ...اضرب بطريقته الخاصة ...بقع بمبى فى شتى انحاءه تعبيرا منه على الغضب الجامح ...جسمى ضارب بقع بمبى ..الدكتور قالى ان الفاضلة تدعى ارتكاريا حبيبية ...بتيجى من التوتر ..مبتنيمنيش الليل ...
وحيث اننى بنام فى المواصلات وانا اعده ...وانا واقفة ...من كتر الزعل ..تجنبا للتفكير ...
وحيث اننى احدثكم الان وان واقفة على رجلى ..علشان ورايا مصائب من مصائب الكلية...
وبما ان ...وحيث ان ...وفى ظل هذا ....
كان لابد من هذا الايس كريم الجميل جدا ...اللى خلانى مبسوطة ومزقططة ...

كنت بشترى النهارده شوية حاجات لوحدى ..ولقيت محل الايس كريم نادينى ..ويفتح لى زراعيه ( بابيه ) مبتسما فى استقبالى ...
بس لو كان فى حد يجيب معايا .. هاكل ايس كريم فى الشارع لوحدى ..وانا بلف على الحاجات .. قلتها محدثة لنفسى
طظ ...طظ كبيرة وعميقة ..صدرت من نفسى ...ناس ايه وبتاع ايه ..مين يعنى ..صحابى الوحشين ...ولا اخواتى الموترين...طظ طظ ظط ..والله لاجيب ايس كريم...

جبت ايس كريم بالشيكولاتة والجوافة ..مشيت ماسكة الشنط فى ايد ..واليد الاخرى معدة تماما للقرطاس المنتظر ..المتدلى منه خطوط شيكولاتة وجوافة ..تتدلى حتى نزلت على يدى ..ومنها الى البلوزة ..وانا اخرج لسانى فى شتى الاتجاهات ..لالحق بكل هذه الخطوط الشيكولاتية المنسابة ..والناس فى الشارع بتبص ( ملاحظة : الشارع كلة محلات ) على الانسة العاقلة اللى مطلعا لسانها ..ومنهمكة فى الايس كريم ..وانا مطلعة لسانى لكل الناس ..اقصد للأيس كريم ..كى العقه ...
الدنيا حر جدا ..الساعة 2 الظهر ..والشيكولاتة ساقعة وجميلة ..والجوافة مسكرة وبتزغزغ سنانى ...انا مبسوطة ..فليسقط الاصدقاء ..ويعيش الايس كريم ...
اركن على جانب احدى السيارات ..غير مبالية بنظرات الناس ..لأخرج ما تبقى معى من مناديل ..حتى ازيل اثار الشيكولاتة من ملابسى ..لاجد يدى "ملزقة" ..فاسرع بطرف المنديل (اللى بأة شيكولاتة) لازيل اثارها من يدى ..ايه ده ..ده البلوزة مبقعة ..بينما انا احاول احافظ على ما تبقى من بقع نظيفة فى ملابسى ..اجد الايس كريم يداعبنى ..وقد عزم على اخراجى من حالة الاكتئاب التى اعيشها ..ليسيييييييييح على ايدى تانى ...
غير مبالية ..امسك الشنط بايدى "الملزقة" ..واستمر فى لعق قرطاس الايس كريم.. اللى مش راضى يخلص...انظر الى الناس فى ابتسامة بلهاء ..غير مبالية بأى شىء ..سوى حبيبى الذى جاء بعد غياب .. "القرطاس" ..قرطاس الايس كريم ..