الخميس، أبريل 17، 2008

ايس كريم


فى ظل الاحداث المشحونة ...مشحونة بموجات من الغيظ و الفرسة ...
وفى ظل الاجواء الساخنة ...المولعة بنار جهنم ...
وفى ظل التوتر السائد على كافة الاصعدة ...وصعيد مصر ...
وفى ظل الصداقة المتلاشية ...
وفى ظل البنات المؤرفين ...
والولاد المجرمين ...
والناس الوحشين ..الوحشين ..الوحشين ..
وبما انى فاضلى شهرين واتخرج ..وورايا حاجات تتعمل فى سنتين ...
وبما انى هفقد لقب غالى بعد شهرين .."الطالبة الجامعية "...
وبما ان اختى فى ثانوية عامة ..وبخاف عليها اكتر من خوفها على نفسها ..وجيبالى ضغط ...
وبما ان ابن عمتى هيتجوز واحدة امريكانية ...اتخضيت اوى لما عرفت ...
وحيث ان جدتى مازالت ترسم فى سيناريوهات اكثر رعبا واثارة ...
وحيث انه الجن راكب جارتنا الفاضلة ...
وحيث انه الضوضاءفى القاهرة وصلت الى 85 ديسيل وفقا لدراسة فى النيويورك تايمز ..يعنى ادوش من قطر سكة حديد ...
وحيث ان المضربين اضربوا جميعا ..كان لا بد له هو الأخر من الاضراب ..تعبيرا عن ذاته ...اضرب بطريقته الخاصة ...بقع بمبى فى شتى انحاءه تعبيرا منه على الغضب الجامح ...جسمى ضارب بقع بمبى ..الدكتور قالى ان الفاضلة تدعى ارتكاريا حبيبية ...بتيجى من التوتر ..مبتنيمنيش الليل ...
وحيث اننى بنام فى المواصلات وانا اعده ...وانا واقفة ...من كتر الزعل ..تجنبا للتفكير ...
وحيث اننى احدثكم الان وان واقفة على رجلى ..علشان ورايا مصائب من مصائب الكلية...
وبما ان ...وحيث ان ...وفى ظل هذا ....
كان لابد من هذا الايس كريم الجميل جدا ...اللى خلانى مبسوطة ومزقططة ...

كنت بشترى النهارده شوية حاجات لوحدى ..ولقيت محل الايس كريم نادينى ..ويفتح لى زراعيه ( بابيه ) مبتسما فى استقبالى ...
بس لو كان فى حد يجيب معايا .. هاكل ايس كريم فى الشارع لوحدى ..وانا بلف على الحاجات .. قلتها محدثة لنفسى
طظ ...طظ كبيرة وعميقة ..صدرت من نفسى ...ناس ايه وبتاع ايه ..مين يعنى ..صحابى الوحشين ...ولا اخواتى الموترين...طظ طظ ظط ..والله لاجيب ايس كريم...


جبت ايس كريم بالشيكولاتة والجوافة ..مشيت ماسكة الشنط فى ايد ..واليد الاخرى معدة تماما للقرطاس المنتظر ..المتدلى منه خطوط شيكولاتة وجوافة ..تتدلى حتى نزلت على يدى ..ومنها الى البلوزة ..وانا اخرج لسانى فى شتى الاتجاهات ..لالحق بكل هذه الخطوط الشيكولاتية المنسابة ..والناس فى الشارع بتبص ( ملاحظة : الشارع كلة محلات ) على الانسة العاقلة اللى مطلعا لسانها ..ومنهمكة فى الايس كريم ..وانا مطلعة لسانى لكل الناس ..اقصد للأيس كريم ..كى العقه ...
الدنيا حر جدا ..الساعة 2 الظهر ..والشيكولاتة ساقعة وجميلة ..والجوافة مسكرة وبتزغزغ سنانى ...انا مبسوطة ..فليسقط الاصدقاء ..ويعيش الايس كريم ...
اركن على جانب احدى السيارات ..غير مبالية بنظرات الناس ..لأخرج ما تبقى معى من مناديل ..حتى ازيل اثار الشيكولاتة من ملابسى ..لاجد يدى "ملزقة" ..فاسرع بطرف المنديل (اللى بأة شيكولاتة) لازيل اثارها من يدى ..ايه ده ..ده البلوزة مبقعة ..بينما انا احاول احافظ على ما تبقى من بقع نظيفة فى ملابسى ..اجد الايس كريم يداعبنى ..وقد عزم على اخراجى من حالة الاكتئاب التى اعيشها ..ليسيييييييييح على ايدى تانى ...
غير مبالية ..امسك الشنط بايدى "الملزقة" ..واستمر فى لعق قرطاس الايس كريم.. اللى مش راضى يخلص...انظر الى الناس فى ابتسامة بلهاء ..غير مبالية بأى شىء ..سوى حبيبى الذى جاء بعد غياب .. "القرطاس" ..قرطاس الايس كريم ..

هناك 41 تعليقًا:

FaceMoon يقول...

ههيييييييييييية اول تعليق احمدك يارب
كدة ياسمر تاكلى ايس كريم من غيرى طيب كنتى جيبينى اساعدك فيه بالهنا والشفا ياحبيبتى وجيبى ايس كريم وترمس ودرة كمان ولا يهمك من حد عيشى حياتك انتى لسة صغنتوتة وانا بقولها معاكى طززززز

ٍSOU يقول...

و لسة اصغر الحاجات هى اللى بتصالحنا مع الدنيا و مع نفسنا ..عارة انتى فكرتتينى بنفسى..لما اكون زعلانة اوى اوى احب اخرج لوحدى و اجيب سبورت كولا -سبورت بالذات مش اى مشروب تانى- و امشى اشربة فى الشارع لوحدى و الى يبص يبص واللى يعلق يعلق المهم انى اتصالح معايا عشان اعرف اكمل و طز فىاى حاجة تانية..بجد اكتشفت ان كلمة طظ دى ابلغ حكمة البشرية ممكن تتعلمها ..
ياريت المره الجاية تبقى تقوليلى عشان اجر اشارك وجبة الايس كريم :))

رامــــى حجــــاج يقول...

أحلى حاجة سيبك من الناس

رصيف نمرة خمسة يقول...

لولولولولولولولىىىىىىى
اول كومنت
هحجز وراجعة ياجميل

رصيف نمرة خمسة يقول...

سمورتشى حبيبتشى عارفه ومن غير ما تقولى انى ندلة ومدخلتش عندك كمان من مدة ولكن ولكن ولكن
مبهديلينا ياختشى فى الكامحة وكان عندى ميد تيرم بقة ومفضتش قال يعنى
بس ايه التدوينة اللذيذة دى انما الشيكولا تحفة انا دقتها معاكى هههه
احيانا الواحد لازم يعمل حاجة لنفسه بس ميهمش الناس شايفينك ازاى اوقات بحس انى عايزة اعمل اكتر من كده بكتير حاجات تجنن يعنى مش ايس كريم فى الشارع بس اجرى مثلا دى اقل امنياتى هههههه
وحشتينى جدا وكلامك الجميل كمان
ومستنية البوست الجاى اوك
ربنا يوفقك ياقمر

بطوط حبوب يقول...

اولا الف سلامه
وليه التوتر الدنيا مش مستاهله والله
نفضى نفضى
هم الى حملوا الهم عملوا ايه؟؟
وموضوع الايس كريم اظن انه دليل قوى وحاسم على انك المفروض تنطنشى
شوفى المره الوحيده الى كبرتى فيها دماغك ومبسطتيش للناس حسيتى بسعاده اد ايه
ابدأى من هنا

Tamer Nabil يقول...

تصدقى ان الايس كريم دة مفعولة وسحرة لية العجب

الواحد بيكون زى الطفل وهو ماسكة ونازل فية هم ياجمل


بالنسبة للعامية والفصحة ولايهمك

اكتبى اللى تحسى بية بأى طريقة

احنا هنا مدونين

وكل مدون يكتب بطريقتة اللى يحبها

تحياتى

*سمر* يقول...

facemoon *
المرة الجاية يا جميلة ..هقولك ..وهعزمينى ... هاهاها ..انتى يعنى اللى هتعزميكى ..فاهمه طبعا .. :))
اشكرك على زياراتك المتكررة اللى بتسعدنى بجد :)

sou *
اكيد المرة الجاية هقولك ..ونجيب سبورت كمان ..ونقول طظ ..
فعلا هى ابلغ حكمة بشرية ..ان الانسان يعيش فى حالة ..يتمتع بحياته ..من غير ما يئذى حد ..
شكرا على تعليقك و زيارتك ..ياريت يتكررو :))

رامى حجاج *
ده القرار الجاى ان شاء الله ..او المنفذ فعليا والله ..اسيبنى من الناس ..
شكرا على زيارتك و التعليق ..يا ريت يتكررو :)

رصيف نمرة خمسة *
ايمى الجميلة جدا ..وحشانى يا بنت :))
ياللا ولا يهمك ..المهم عملتى ايه فى الميد تيرم ..انا لسه مخلصاه برده :)
شكرا يا ايما على تعليقك هنا ..وعند جدتى :) ..اوعى تتأخرى تانى يا بنوته ..بلا امتحانات بلا كلام فاضى :))
بجد يا ايمى زياراتك بتسعدنى :)

بطوط حبوب *
الله يسلمك ..فعلا انا بعد كده هنفض هنفض :))
لء بجد هو ده الحل السهل لراحة البال و الهدوء ..
شكرا على تعليقك الغالى ..والزيارة الاغلى ..اتمنى تكررهم على طووول :)

tamer nabil *
فعلا مفعوله سحرى ..اسألنى انا ..
شكرا على زيارتك و التعليق ..يا ريت تكررهم :)

Miso soup يقول...

الللللللله ... جميل اوي استمتاعك بحاجة حتي لوكانت صغيرة او تافهة (في عيون الناس) .. انا برضه لما بكون قرفان بفك عن نفسي بشوية "عربدة ذاتية" :)
ربنا يوفقك في المناقشة الدراسية و يا ريت تبقي تشركينا معاكي :)

ياسر يقول...

شوفتي بقي ياسمر
حتة قرطاس ايس كريم
نساكي كل الهموم والدنيا
وانا واثق اثناء حربك مع القرطاس
والبلوزة كنتي مبتفكريش في اي حاجة
الاا انك تخلصي علي القرطاس وتمسحي
بلوزتك بس حقيقي موقف كويس يعني
شوية زي دول كانت راسك فاضية من
مشاكل الحياة عارفة انا اما اكون مضايق
من حاجة او بالي مشغول بحط سماعات
الكمبيوتر في وداني او لو كان الويك اند
اشغل موسيقي عالية جدا بس اهو
بتخرج الواحد شوية من همومة الدنياوية
وبالف هنا وشفا الا يس كريم دة
لو كنت لحقتي منة شوية
بس علي فكرة اجمل حاجة
في مقالاتك اسلوبك المتميز
اسلوب بنت البلد المصراوية
الا تحب ترسم الابتسامة علي
وجوة الناس او اصدقائها
دومتي بخير سمر
وتحياتي اليكي

شا عر الأ حزان / احمد هيكل يقول...

السلام عليكم ورحمة الله وبركاته
يتشرف اتحاد المدونين المصريين بدعوة سيادتكم لحضور اجتماع الاتحاد يوم 25 / 4 فى كافيتريا المحروسة التابعة لفندق المحروسة للقوات المسلحة بالاسكندرية الساعة العاشرة صباحا .
وتفضلوا بقبول فائق الاحترام
مع تحيات اعضاء اللجنة الاجتماعية
وادرة منتديات اتحاد المدونين المصرين
http://egtadwin.yoo7.com/index.htm

Abo 7anf يقول...

السلام عليكم
صدقينى يسمر اكبر هم بيروح باصغر حاجه
انا بصفتى دكتور ان شاء الله مستقبلا منكرش ان الايس كريم مزيل للاكتئاب
وشئ ظريف
بس لسه محدش خد بالو
و بجد اسلوبك جميل
وتقبلى مرورى

HelSiNg يقول...

الف سلامة عليكى..

اعملى اللى انت عايزاه واللى انتى حساه وسيبك من الناس

drsamoor يقول...

دايما ابسط الاشياء هي اللى بتغسل ارواحنا. حضن دافى،ضحكة من جوة بجد،ايس كريم يبوظلك سنانك فانا اكل عيش!كده يعنى:)

شا عر الأ حزان / احمد هيكل يقول...

السلام عليكم ورحمة الله وبركاته
من اجلك
من اجل الحريه
من اجل كل مدون مصري
من اجل الدفاع ع ن حقوقنا
عا يزن نغير شيء
عايزن نعمل حاجه
عا يزن نغي الكلام اللي بيتقال علينا تعالا او تعالي
نبني حلمنا سوه
نبق ايد وحده
لو اتحدنا اكيد هنقدر
ومتقولش مستحيل
ومتقوليش مش هينفع
منتظر تعلقتكم


يتشرف اتحاد المدونين المصريين بدعوة سيادتكم لحضور اجتماع الاتحاد يوم 25 / 4 فى كافيتريا المحروسة التابعة لفندق المحروسة للقوات المسلحة بالاسكندرية الساعة العاشرة صباحا . وتفضلوا بقبول فائق الاحترام مع تحيات اعضاء اللجنة الاجتماعية وادرة منتديات اتحاد المدونين المصرين
ولي اي استفسر
تا بعونا ع البريد التالي
ahmedhiqal@yahoo.com
وكماندعكم بالمشاركه في منتدكم
الجديد
منتدي لك
فوجب عليكم التسجيل
في اتحاد المدونين
المصرين
الذي يضم
نخبه
من اهم الشخصيات
محماين
وصحافه
واعلام
ننتظركم
تسجيل متاح لكل الأ عمار
http://egtadwin.yoo7.com/index.htm

*سمر* يقول...

miso soup *
شكرا جدا يا وليد ، ان شاء الله اول لما أخلص المناقشة هكتب عنها ..
فعلا اللحظات المسروقة دى من وسط المسئوليات ..هى اجمل لحظات ..مهما كانت قليلة وصغيرة ..
بس ايه حكاية "عربدة ذاتية دى"...يعنى ايه :)) ؟؟؟ الناس بتعمل ايه فيها يعنى ؟؟ لء بجد بجد عايزه اعرف :)

ياسر *
فعلا الحاجات الصغيرة دى بتفرح اوى ..وشكرا على اطرائك على اسلوبى ..اسعدتنى بتعليقك..اتمنى تكررالزيارة :)

abo 7anaf *
شكرا يا دكتور على الروجيته السهلة دى ..بس اصرفها من انى صيدلية :))
اطرائك على اسلوبى اسعدنى ..اتمنى تكرر الزيارة :)

helsing *
الله يسلمك ..فعلا ده اللى انا هعمله بعد كده..
شكرا على الزيارة و التعليق ..اتمنى يتكررو :)

drsamoor *
صح يا سمورة ..هى الحاجات الصفيرة دى اللى بتفك الضغوط ..عندك حق :)
شكرا على زيارتك وتعليقك ..اتمنى تكرريهم

واحد من البلد دى يقول...

لو سمحتى يا سمورة...أنا عايز واحد آيس كريم...آه والله..أصلى باكتب التعليق ده فى عز الحر...والله جريتى ريقى..منك لله..تحياتى ليكى

haitham يقول...

بوست هايل بس اى حاجة عايزين نعملها
المفروض نعملها من غير ما نستنى حد وايه يعنى لوحدنا بس رضينا نفسنا

تحياتى

مؤنس فرحان يقول...

وسط الحر والزحمة والناس
وحاجات كتير بتضيع وبتنداس
أنا شوفته

وسط الغضب وسط الطهقان وضياع الإحساس
وحاجات كتير بتظهر وتختفى فى الراس
أنا شوفته

إضراب وحساسية ونظرات زى الرصاص
مين بيتجوز . مين بيتخرج . مين محتاس
وسط دا كله .. أنا شوفته

دوشة وضوضاء ومحلات كلاس
توتر وتدوين و رغى وخلاص
أنا شوفت حبيبى القرطاس
..........................

هههههههههههههههههههههههههههههههههههههههههههههه

عفوا يا سمر دا جا على بالى وكتبته بعد البوست بتاعك علطول
............................

زى ماقلنا كتير أوقات بتكون حاجات بسيطة أوى تخرجنا من هموم كبيرة أوى
المهم ان مع الحاجات البسيطة دى نحس بنفسنا وذاتنا من غير أى تكلف

الآيس كريم .. يا سلام .. أراهنك ان كل اللى قرا البوست قال يا بختك ..

أكتر حاجة بتريحنا اننا نكون نفسنا وننسى الناس حوالينا بقصور تفكيرهم ونظرتهم السطحية لينا

وبالنسبة للتدوين زى ماقال تامر نبيل انتى حرة فصحى على عامية على يابانى حتى

المهم اللى جواكى تعبرى عنه بكل راحة

طز لكل واحد بيبص لى وموش عارفنى وطز فيا انا كمان لأى شخص ببص له وابنى وجهة نظر قد تكون بعيدة كل البعد عنه عشان انا معرفوش

شدى حيلك فى امتحاناتك و ربنا معاكى

monaliza يقول...

بالتوفيق ان شاء الله
انا بقى عشان حركات قراطيس الايس كريم دى بجيب كوباية ههههههه

Nazk El Maleka يقول...

ههههههه

بالهنا والشفا
فلتسقط نظرات الناس وليعيش الايس كريم

:D

*سمر* يقول...

من البلد دى *
المرة الجاية بأه هجيبلك معايا :)
شكرا على الزيارة والتعليق ..اتمنى يتكررو ..خاصة انى بحب مدونتك جدا

Haitham *
وايه يعنى لو لوحدنا ..بس رضينا نفسنا" ..بالظبط كده :)
شكرا على الزيارة و التعليق ..اتمنى اشوف تعليقاتك تانى ..
وتمنياتى لك بالتوفيق

مؤنس فرحان *
ايه الجمال ده ..لء بجد هايلة ..ومعبرة جدا على البوست ..فعلا انا شوفته وكنت مستنياه ..القرطاس المحترم :))
فعلا انت عندك حق ..الانسان يسيبه من كل الحاجات السطحية دى ..ويركز مع نفسه ..ويتجنب تتبع الاخرين ..هيرتاح اخر راحة
شكرا يا سمير ..والى لقاء قريب ان شاء الله :))


Monaliza *
لا الكوباية برده مش بتديكى احساس القرطاس :)) ..القرطاس ده شىء تانى خالص ..كله كوم ..وكلهم كوم تانى (الكوبايات يعنى ) :)))
زياراتك بتسعدنى ..واتمنى متقطعيهاش

Nazek el malaaeka *
ي..يعيش ....ي .. يعيش...ي ..يعيش
يعيش قرطاس الايس كريم :)
شكرا على الزيارة و التعليق ..عايزة اشوفك تانى

Miso soup يقول...

ازيك يا سمر
يا رب تكوني اتوفقتي في المناقشة الدراسية
و الله انا مش عارف بالضبط تعريف لغوي للعربدة الذاتية لكن معناها اني اعمل حاجة .. اي حاجة .. مكونش في العادي بعملها و لما اعمل الحاجة ده اشعر بالسعادة و بآني اتخلصت من الضغوط اللي عليا
برآة اختراع الكلمة ده تعود لزميلة ليا لما كنت في الجامعة و يعني الكلمة عجبتني و علقت معايا لحد دلوقت :)

صحفية روشة يقول...

ده نوع من انواع القصص القصيرة؟؟
بس بجد لذيذة
تعرفى انى معظم الوقت ببقى عاوزة اعمل كدة بس بتكسف
احييكى على شجاعتك
وطظ فى الدنيا كلها

إخوانى حتى النخاع يقول...

والله على رأيك .. يسقط الكل ..
ويحى الأيس كريم

بتفكرينى بنفسى لما بيكون بتاع غزل البنات معى

واشترى منه عصاية كدا فيها غزل بنات كتير أوى كدا .. وقاعد أفترسه إفتراسا


تشكر على البوست داا


تعالى شوفى آخر بوست بعد الحداد ...

أخوكى

حطم القيود يقول...

وااااااو

ايس كريم...وف الحر ده...وبالمواصفات القياسيه اللى قولتيها دى

ااااااااااااه

مين قدك ياعم :)

ربنا يوفقك في الكليه والمناقشه دى يارب....انا قربت اتخرج زيك...ربنا يوفقنا جميعا

Ahmed Al-Sabbagh يقول...

ههههههههههه

اسلوبك جميل جدا

وبعدين كل ده وتبقى بتاكلى ( آيز كريم ) ولوحدك كمان

بس بجد مدونتك جميلة جدا

واسلوبك اكتر من رائع

تحياتى لكى

احمد الصباغ

إخوانى حتى النخاع يقول...

ههههههههههههه

شكلى اتلغبط بينك وبين مدونة تانية

بس هكتب تعليق تانى


والله ولا يهمك ... انا أحسن حاجة بعملها
بلاقى الراجل بتاع غزل البنات فى الشارع
بروح .. آخذ منه عصاية وفيها غزل بنات بربع جنيه

وانتى قاعدة تفترسى عزل البنات

تشكرى عل البوست الحجلو دا
ومعلشى على اللغبطة

انا رايح أشوف انا حطيت التعليق الى المفروض يكون بتاعك فين؟؟
ههههههههههههههههههههههه

monaliza يقول...

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التالي
http://kawlansadida.blogspot.com/2008/04/blog-post_21.html
همتك معانا ياجميل ادخلى المدونة دى واتركى فى التعليق اسمك ورابط مدونتك

*سمر* يقول...

miso soup*
شكرا على الرد يا وليد ..انا كده فهمت .. بس مصطلح ظريف ..فعلا براءة اختراع :)

صحفية روشة*
شكرا على الزيارة والتعليق ..
اتمنى يتكررو..نورتينى :)

اخوانى حتى النخاع*
لء انت فعلا علقت هنا ..مفيش لخبطة ولا حاجة ...
وانا شوفت التدوينة الاخيرة بتاعتك ..وعلقت كمان
وبعدين تنورنى دايما ..ولو 1000 مرة :)

حطم القيود*
ويوفقك انتى كمان ..
منورانى دايما :)

ahmed al-sabagh*
شكرا جدا جدا على زيارتك..زيارتك شرفتنى..ومتشكرة (بشدة) على الاطراء الجميل ده....
يارب يارب متكونش مجامله..ده لو مكانتش مجامله هفرح اوى بشبابى :))
اتمنى اشوف تعليقاتك دايما كده منورة عندى :)

Hosam Yahia حسام يحى يقول...

عقبالنا

اما ناكل ايس كريم

بس بعد الامتحانات بقا

انا بدات الامتحانات

دعوواااتك

عمرو يقول...

فعلا الايس كريم هو فاكهه الصيف
والله من يومين كنت معدي من جنب عربيه الابس كريم واخذت اتنين واكلتهم وكمان اتنين وكمان اتنبين يعني سته
بس ما حدش يقدر يبص لي لاني ولد
ولانه يخاف لاني ممكن اخذق عينيه
http://abyad-eswed.blogspot.com/
لازم الجميع يشوف اول تدوينه بس ايه بالابيض واسود
وسلام
وربنا يخلي الايس كريم رخيص اصل انا خايف يغلي وما اعرفش اكله

بنات صاحبة الجلالة يقول...

الاهم من كل دا بالف هنا وشفا الايس كريم طبعا تيب كنتي عزمتنيا معاكي الواحد فعلا ميهمش حد طول ماهو ماشي صح ومش بيعمل حاجة تاذي حد

لذيذ اوي البوست دا تسلم ايديكي

Tamer Nabil يقول...

ترن ترن

الواا

سمر موجودة

انتى فين

فى انتظار جديدك

تحياتى

*سمر* يقول...

حسام يحيى*
ربنا معاك ان شاء الله ..انت خلص وجيب مجموع ..وانا اللى هعزمك :)

عمرو*
يا ماما ...6 ايس كريم ..وكما هتخزء عينيه ...لالا..ده الموضوع كبير ..وبعدين متقلقش ..لو الايس كريم غلى ..ابأه خزء عنيين البياع ..يرخصلك على طول ..
هشوف اكيد التدوينه ...حاضر
شكرا على زيارتك ..والتعليقف ..اتمنى يتكررو :)

بنات صاحبة الجلاله*
اسم حلو اولا ..
ثانيا ..شكرا على زيارتك والتعليق ..يا ريت تكرريهم ...
مبسوطه ان البوست عجبك :)

تامر نبيل*
الوووو ...تامر ..انا فى الطريق اهو ..بس البوست سبقنى :))
شكرا على سؤالك ..اسعدتنى بجد :)

dina يقول...

لا انتى طلعتيها فى دماغى بجد يعنى..انا حنزل اديها ايس كريم ما دام بيطلع كدا من المشاكل و طظ كبيرة عميقة بردو فى الناس
ههههههههه
تحياتى

مصطفى عثمان يقول...

سمر
دايما اللحظات المجنونه اللي بتخرج عن المألوف و الروتين هي اللي بتحسسنا اننا بني ادمين و عايشين
مش اللي نبات فيه نصبح فيه
تدوينه جميله جدا
احلى ما فيها تلقائيه اسلوبها و خفه دمها
شكراااااا

*سمر* يقول...

dina*
:) ...شكرا يا جميلة على حرصك على التعليق عندى دايما..
تعليقاتك دايما جميلة وبتضيف

مصطفى عثمان*
اكيد هى دى اللحظات اللى بتحسنا ان احنا عايشين ...
متشكرة على اطرائك...على فكرة مدونتك عجبتنى جدا جدا ..وان شاء الله هتابعها على طول :)

أحمد كجول يقول...

أولا ما شاء الله مدونة مميزة و مضمون فعلا متميز .....

ثانيا أدعوك لدخول مدونة الصحبة الشبابية و مشاركتنا أرائك و أفكارك بل و تعليقاتك و خاصة بموضوع

الشباب و التغيير فى مصر

أرجوك كن اجابي ولو برد لأن شرف ليا اني أشوف تعليق عندي أرجوك متحرمنيش ردك و تعليقك ,, رجاء مش أمر " يا تري حتكسفني ولا لأ " ....

و عموما ... جزاك الله خيرا علي أي حال

http://so7bah.blogspot.com/

ميرو انتكة يقول...

عجبتنى جدا على فكرة وعجبنى اسلوبك البسيط وربنا يوفقك يا سمر

NODY يقول...

انا اول مره ادخل البلوج وشدنى اوى موضوع الايس كريم لانى بموت فيه
وان شاء الله اكون من المتابعين للبلوج دايما