الشتا تقريبا جيه يا نناه .. وانتى معايا فى كل وقت فيه .. حاجة صعبة قوى قوى يعنى .. قلبى واجعنى، بس مش عليكى .. على نفسى.. .كان نفسى افهمك صح .. واتمتع بيكى .. وامتعك
حاسه انى فاضية او مجوفة .. اه .. عايشة حياتى عادى .. بس مجوفه .. وقلبى مكسور وحزين.
ساعات كتير ببأه خايفة من حاجات كتير .. وجودك على فكرة كان امان وبركة، بس انا كنت عارفه كده وقتها .. انتى كنتى مميزانى
وعزّانى.
وعزّانى.
"انتى معايا فـ كوباية الشاى باللبن اللى بشربها وهى بارده عشان مبأتيش تقوليلى "اشربيلك بقّين وهو سخن
ومعايا فـ ريحة كريم نيفيا اللى كنتى بتحبيه وبيجيبوهولك من السعودية والكويت وهم راجعين.
معايا فـ شكل جسمك السمين الطرى الجميل ف الروب الموف الشتوى بتاعك اللى ف اخر سنتين كبر عليكى اوى وبأه مدلدل شويه .. ومعايا برده ف كل ليلة ف بيتك لما ادخل انام من غير مطمّن انك دخلتى الحمام عشان متقوميش بالليل لوحدك وتتكعبلى ولا حاجه بعد الشر .. ونعد نتخانق كل ليلة :)
ومعايا فى الدعوة اللى مبأتش اسمعها منك لما كنت اغطيكى بالليل (يا رب يغطيكى العريس).
معايا فـ حباية التنورمين اللى مبأتش اديهالك كل يوم الصبح .. وف كوباية الشاى باللبن تانى، بس بتاعة الصبح قبل مانزل واسيبك تسمعى قرآن.
